1
Ñamadu Ru Ete tenondegua
oyvy ruparã i oikikuaámavy ojeupe,
oyvárapy mba’ekuaágui,
okuaararávyma
opopygua rapyta íre
yvy ogueromoñemona i oiny.
2
Pindovy ombojera yvy mbyterãre;
amboae ombojera Karaí ambaré;
Pindovy ombojera Pindovy;
ára yma rapytáre ombojera Pindovy;
Pindovy peteî ñirûi ombojera:
Pindovýre ojejokua yvy rupa.
3
Mboapy meme rire oÿ yva;
yva ijyta irundy:
yvyra ’ípy ijyta.
Yva itui va’e yvytúpy
oayña imondóvy Ñande Ru.
4
Yvyra’I mboapýpy rangê omboupáramo,
oku’e poteri yva;
a’éramo ae oî endaguãmy,
ndoku’evéima.
5
Yvy rupa mongy’a ypy i are
mbói yma I;
a’anga I tema ñande yvýpy ãngy oiko va’e:
a’ete i va’e
oî ãngy Ñande Ru yva rokáre.
6
Ñande Ru tenonde yvy rupa
ogueojae’o ypy i va’ekue,
yrypa i, ñakyra pytã i.
7
Yrypa yima oime
Ñande Ru yva rokáre:
a’anga i tema ãngy opytya va’e
yvy rupáre.
8
Yamai ko yja,
y apo are.
Ñande yvýpy oî va’e
a’ete ve’eÿma:
a’ete va’e oime Ñande Ru yva rokáre;
a’anga i tema
ãngy ñande yvýpy oiko va’e.
9
Ñande Ru, yvy ojapóvy,
Ka’aguy meme araka’e:
Ñuu jipói araka’e.
A’éramiramo,
ñuu ruparãre omba’apo va’erã
tuku pararã i ombou.
Tuku pararã i guevi oikotu i ague,
kapi’i rembypy i oñemoña:
a’égui maê oiko ñuu.
Ñuu ogueropararãrã,
oguerochiri tuku pararã i.
A’ete va’e
Ñande Ru yva rokárema oime:
ãngy opyta va’e a’enga i téma.
10
Ñuu ojekuaa i mavy,
ogueroñe’endu ypy i va’ekue,
oguerpvy’a ypy i va’ekue,
inambu pytã.
Inamvu pytã
ñuu ogueroñe’endu ypy i va’ekue,
oime ãngy Ñande Ru yva rokáre:
yvy rupápy oiko i va’e,
a’anga i téma.
11
Ñande Ru yvy rupa omboai ypy i va’ekue,
tatu i.
A’ete va’eÿma
tatu i ãngy eve oiko i va’e ñande yvýpy:
a’e va’e a’anga i reitéma.
12
Pytû já, Urukure’a i.
Ñande Ru Kuaray, ko’ê ja.
Baptista, Josely Vianna. “Ivy Tenonde – Primeira Parte.” Roça barroca. São Paulo: Cosac Naify, 2011. pp. 42-48.